Danni í DDV

Gengur allt á afturfótunum

2006-10-30T19:47:00.000Z

Síðasta vika er búin að vera skelfileg og ég hef þyngst töluvert. Þetta gerðist líka síðast þegar ég náði niður fyrir 100 kílóin. Ég gefst samt ekki upp og markmiðið um 97 fyrir 20. nóvember stendur! Ég er búinn að ákveða að gera líkamsæfingar heima hjá mér í hálfa klst. á dag. Magaæfingar, arbeygjur o.s.frv. þangað til ég kaupi e-ð æfingamyndband. Mér sýnast vera til milljón svoleiðis en ekkert þeirra er miðað að miðaldra körlum sem eru að reyna að létta sig.

Langþráðu takmarki náð

2006-10-24T18:18:00.000Z

Í vigtuninni áðan var ég 99,7 kíló! Þetta er í fyrsta sinn í lengri tíma sem ég er innan við 100 kíló. Raunar man ég ekki hvenær ég var síðast undir þeim mörkum en það hefur eflaust verið á menntaskólaárunum. Þá er ég búinn að missa 27,3 kíló frá því ég byrjaði eða 60,6% af því sem ég setti mér sem markmið. Ég er að hugsa um að setja mér markmið í tilefni af þessu.
Ég byrjaði í DDV rétt fyrir 20. nóvember á síðasta ári. Sá fundur sem lendir næst þessu er 21. nóvember. Ég stefni á að vera búinn að létta mig um 30 kíló þá, þ.e. að vera undir 97 kíló.
Það slæma við þetta er það að ég lofaði sjálfum mér því strax í upphafi að ef ég næði að komast undir 100 kíló mundi ég taka upp einhvers konar líkamsrækt. Það þarf helst að vera eitthvað sem ég get stundað heima hjá mér og kostar engan pening. Ég tek næstu viku í að hugsa þetta, ákveða hvað verður fyrir valinu og hefja æfingar. Meiri fréttir um það næst.

Markmið?

2006-10-17T21:37:00.000Z

Síðasta vika gekk mjög vel og ég léttist um 1,1 kíló. Það þýðir að ég er núna 101,2 kíló. Þar af leiðir að nú er gott að setja sér markmið. Ég byrjaði í DDV í nóvember á síðasta ári (rétt fyrir 20. nóv). Af því tilefni ætla ég að setja mér það markmið að komast niður fyrir 100 kílóin áður en nóvember 2006 gengur í garð. Ég hef nákvæmlega 14 daga! Ég er sem sagt búinn að léttast um 25,8 kíló sem er 57,3% af takmarkinu.

600 grömm

2006-10-15T20:44:00.000Z

Í síðustu viku léttist ég um 600 grömm. Það er ekki mikið en samt ásættanlegt. Sérstaklega í ljósi þess að á sunnudeginum komu Jói mágur og Kata í heimsókn með nammi, en við Gulla höfðum keypt bakkelsi fyrir heimsóknina. Af þessu át ég eins og ég ætti lífið að leysa. Ég hef haft einn svona nammidag í viku, oft á þriðjudögum í kjölfar vigtunar og þá hef ég leyft mér að fá mér súkkalaðistykki eða sætabrauð. Fyrir síðustu viktun voru því tveir nammidagar og sá síðari í raun bara sukk. Í því ljósi hljóta 600 grömm að vera ásættanlegt. Síðan þá hefur hins vegar gengið vel og ég geri mér vonir um að hafa lést um meira en 600 grömm á þriðjudaginn. Hins vegar er ég í Reykjavík þessa stundina og Reykjavíkurferðir hafa oft reynst ansi óDDVvænar. Ég er að reyna að breyta út af því.

Þyngdist fyrst en léttist svo

2006-10-05T17:41:00.000Z

Ég skráði ekkert síðustu tvær vikur en síðustu viku fór ég ekki í vigtun. Það afsakaði ég fyrir sjálfum mér með því að það væri svo mikið að gera í náminu en í raun vildi ég ekki fara þar sem ég hafði ekki vandað mig í mataræðinu á þeim tíma. Vikuna þar á undan var ég 105,3 og hafði því þyngst um 400 g frá síðustu viktun þar áður. Á þriðjudaginn síðasta tók ég míg því taki og vandaði mig mjög alla síðustu viku með þeim afleiðingum að ég var 102,9 núna á þriðjudaginn og léttist því um 2,4 kíló frá því ég fór síðast í vigtun. Þessi vika byrjaði ekki vel en ég hef passað mig frá því í gær og það skilar vonandi árangri í nsætu viku. Ath. að DDV-vikan er frá þriðjudegi til þriðjudags.

104,9

2006-09-17T12:46:00.000Z

Í vigtuninni síðasta þriðjudag var ég 104,9 kíló. Það þýðir að ég léttist um 1,3 kíló í vikunni og hef misst 22,1 frá upphafi. Það sem af er þessari viku hefur mér hins vegar gengið frekar illa. Í stressi fyrir aðalfund BKNE hef ég ekki haft tíma né nennu til að hugsa um eða framkvæma almennilega matargerð. Hins vegar hef ég nartað ótæpilega í súkkulaði, kex og snakk. Ég geri því ráð fyrir að hafa þyngst eitthvað næsta þriðjudag eða í besta falli að standa í stað. Við sjáum bara til.

106,2

2006-09-05T20:32:00.000Z

Í vigtuninni áðan var ég 106,2 kíló. Ég léttist um 1,2 í síðustu viku og hef misst 20,8 frá upphafi.

107,5

2006-09-01T14:30:00.000Z

Þetta var ég í síðustu viktun. Þannig að ég er þá búinn að léttast um 19,5 frá upphafi og 5 frá því ég byrjaði aftur í haust.

2,9

2006-08-22T22:04:00.000Z

Var 109,4 í vigtuninni í dag. Þá hef ég misst 2,9 kg. í vikunni. Mest allt vökvatap býst ég við. Það gera 17,6 frá því þegar ég byrjaði.

DDV hefst á ný

2006-08-19T14:32:00.000Z

Þá er það byrjað. Ég fór á fund í síðustu viku. Staðan:112,5

105,6

2006-07-04T13:46:00.000Z

Þetta var talan á vigtinni minni í morgun. Það þýðir að ég hef náð af mér 2,4 kílóum á síðustu viku (reyndar síðustu sex dögum því ég vigtaði mig á óðinsdagsmorgni síðast). Þetta er ágætis árangur og ég held ótrauður áfram. Það hefur ekki verið mikið vandamál að taka upp hefðbundið mataræði eftir fríið þó það hafi nú ekki veriðð mjög nákvæmlega DDV miðað.

Byrjaður aftur í 108

2006-07-01T22:56:00.000Z

Síðustu vikuna sem ég var í DDV náði ég að komast niður í u.þ.b. 101 kíló. Það var í vigtun hjá DDV sem mælir mig alltaf léttari en vigtin hér heima. Eftir það var ég á leið í sumarfrí. Skólinn var að hætta og fullt að gera og alls kyns gerviafsakanir ollu því að ég ákvað að hætta fram yfir Englandsferð.
Nú er henni lokið og ég er byrjaður aftur. Það hefur reyndar ekki gengið neitt sérstaklega vel fyrstu dagana en ég hef samt ekki tapað mér í sælgæti, kökum eða þvílíku heldur. Í dag fékk ég mér eina skál af ís. Það var nú allt of sumt. Vikurnar eftir að ég hætti mældist ég 103 - 104 kíló á heimilisvigtinni sem er svipað eða örlítið meira en ég var þegar ég náði 101 hjá DDV. Þegar ég kom heim sagði heimilisvigtin 108. Þannig að það lítur út fyrir að ég hafi bætt við mig 4 kílóum á Englandi. Nú er DDV í fríi í júlí svo ég skrái mig líklega ekki aftur og hef þátttöku í félagsskapnum fyrr en í ágúst. Þangað til set ég mér það markmið að komast niður í 100 - 101 kíló (Þ.e.a.s. á heimilisvigtinni sem ætti að gera u.þ.b. 99 hjá DDV). Þetta eru 8 kíló á fimm vikum og ég veit að það er kannski svolítið djarft, en ég skal komast vel (3-4 kíló) niður fyrir hundrað áður en skólinn byrjar aftur í haust.

Kvíði fyrir týsdeginum

2006-05-20T23:32:00.000Z

Mig er farið að kvíða týsdeginum. Síðustu dagar hafa nefnilega verið sukkdagar dauðans. Eurovisionpartý á þórsdaginn þar sem ég át yfir mig af ís og hrískúlum. Kótilettur í raspi í matinn í gær og óvissuferð með skólanum þar sem var ótæpilega drukkið rauðvín og bjór langt fram á nótt. Í dag var svo beikon og egg, ristað brauð og afgangurinn af kótilettunum í morgunmat/hádegismat þegar ég skreið fram úr kl. tvö eftir hádegi. Annað Eurovisionpartý í kvöld þar sem ég hámaði í mig kjúkling, ís, nammi og meira rauðvín. Þar af leiðir að ég held að ég nái ekki að fara undir hundrað kílóin á týsdaginn. Það er samt aldrei að vita. Sunnudagurinn og mánadagurinn gætu verið drjúgir. Við verðum bara að sjá til.

Tvöhundruðogeitt gramm!

2006-05-17T22:16:00.000Z

Í vigtuninni í gær var ég 100,2 kíló. Það þýðir að ég á 201 gramm eftir í að komast niður í tveggja stafa kílóatölu. Þar með hef ég líka létt mig um 26,8 kíló frá því að ég byrjaði. Þetta er ótrúlegri árangur en mig gat órað fyrir.

Ich bin zehr froh

2006-05-09T20:03:00.000Z

Ekki veit ég hvort zehr er rétt stafsett hjá mér hér að ofan en hitt er öruggt að ég er mjög glaður þessa dagana. Mér gekk vel í síðustu viku og missti 2,4 kíló. Þar með stendur vigtin í 101,3 og 25,7 kíló farin. Með þessu áframhaldi kemst ég niður fyrir 100 kílóin í næstu eða þarnæstu viku. Kílóateljarinn hjá Jóa er enn úti og ég nenni ekki að fara aftur í þetta tickerfactory dæmi sem var með eindæmum leiðinlegt. Ætli ég reikni ekki bara sjálfur hvað þetta eru mörg prósent: 57,11% farin, 42,89% eftir.

Same old, same old

2006-05-04T14:14:00.000Z

Nú eru sömu tölurnar búnar að vera á vigtinni minni frá því rétt fyrir páska. Þá náði ég páskatakmarkinu og síðan eru búin að vera páskaegg og fermingarveislur. Mér sýndist ég hafa þyngst um 3 kíló í fermingarvikunni og fór ekki í vigtun eftir það. Síðasta vika var mjög góð og í vigtuninni á týsdaginn hafði aðeins þyngst um 400 grömm frá því strax eftir páska og þá í raun bara um 200 grömm frá því að ég náði páskatakmarkinu. Mér sýnast tölurnar á vigtinni heima vera á hægri en stöðugri niðurleið og bind því vonir um að þessar tölur sem ég er búinn að hafa fyrir augunum allan aprílmánuð fari nú sömu leið og snjórinn. Hið versta mál er hins vegar að síðan hans Jóa mágs liggur niðri og þess vegna er vigtarlínan flotta dottin út. Ég vona að Jói kallinn fari að koma þessu í lag bráðlega en líklega gerir hann það þó ekki fyrr en eftir prófin hjá sér.

Páskastaðan

2006-04-18T17:47:00.000Z

Mér til mikillar furðu þá þyngdist ég ekki yfir páskana heldur léttist um 200 grömm. Það er vissulega ekki mikið en miðað við að ég passaði mig ekki neitt og guffaði í mig bakkelsi í Sandvík og páskaeggi (heilu nr. 6 frá Bónus) ásamt ýmsu öðru þá er þetta bara frábært. Ég er búinn að passa mig vel í dag og ætla að halda því áfram næstu viku með eftirfarandi undantekningum: Á morgun fer ég suður og á leiðinni verð ég að borða kvöldmat í einhverri þjóðvegasjoppu, alla daga í suðurferðinni verð ég í mat hjá öðrum og borða bara það sem að mér er rétt, á þórsdaginn er ég að fara í fermingarveislu og ætla að fá mér af kökunum, á sunnudaginn er ég sjálfur að halda fermingarveislu og keyri svo norður um kvöldið og borða bara það sem mér sýnist þann dag. Á mánadaginn næsta byrjar svo DDV aftur. Ég á því frekar von á að þyngjast (skrifaði fyrst yngjast, ha, ha, ha) frekar en hitt. Í ljósi reynslunnar er þó aldrei að vita.

Engin vigtun

2006-04-12T12:06:00.000Z

Það er engin vigtun þessa vikuna en samkvæmt vigtinni hérna heima hef ég misst u.þ.b. kíló í síðustu viku. Það er þó ekki alveg að marka hana þar sem hún sýnir alltaf meira en vigtin hjá DDV. Ég hef ekki passað mig á að halda matardagbók síðustu viku og borðað smá umfram það sem til er ætlast. Fékk mér kökusneiðar (tvær) og einn kleinuhring í Sandvík um helgina og borðaði nokkrar kaffisúkkulaðibaunir í gær. Planið framundan er að halda sig við DDV í dag, skírdag og freysdaginn langa. Á laugardaginn eru tvær sýningar á kardimommubænum svo líklega verður pizza eða brauð á milli, tek það í staðinn fyrir kvöldmat. Á sunnudaginn eru svo páskarnir og þá ætla ég að flotta mig með því að fá mér páskaegg. Næsta vika verður svo DDV væn fram á óðinsdag. Þá fer ég með strákana í bæinn og læt DDV hvíla fram á mánadag. Enda að fara í fermingarveislur sumardaginn fyrsta og sunnudaginn 23. (það er fermingarveislan hans Dags).

Að opinbera sjálfan sig

2006-04-04T20:19:00.000Z

Þegar ég byrjaði í DDV og hóf að skrifa þessa dagbók ákvað ég að hafa þetta bara fyrir sjálfan mig. Ástæðurnar fyrir því voru svosem margvíslegar en sú stærsta var líklega sú að ég treysti því ekki að ég myndi halda þetta út. Núna eru hins vegar liðnir rúmlega fjórir mánuðir og ég er enn að þrátt fyrir tímabil þar sem ég hef verið við það að gefast upp (aðallega á grænmetisáti). Ég hef hins vegar aldrei dottið í það að hætta alveg. Vissulega hef ég svindlað stundum, fengið mér nammi yfir jólin, sleppt því að vigta mat, hætt að nenna að halda matardagbók, ekki náð því í lengri tíma að klára grænmetisskamtinn minn, en þrátt fyrir þessi hliðarspor hef ég passað mig á því að halda mig innan ramma DDV og það virðist vera að bera árangur. Í vigtuninni í dag var ég 103,5 kíló og þar með eru 23,5 kíló farin. Miðað við markmiðið mitt, sem í upphafi var sett út frá þumalputtareglu sem segir að æskileg kjörþyngd sé u.þ.b. hæð mínus 100, er ég búinn að léttast um meira en 50% af því sem ég ætlaði mér. Hvort sem lokatakmarkið breytist eða ekki þegar ég fer að nálgast það þá hef ég ákveðið að gera þessa dagbók mína opinbera. Sú opinberun felst nú samt ekki í öðru en að ég ætla að setja tengil á hana inn á bloggsíðuna mína.
P.S. Þar sem páskatakmarkið mitt náðist þá ætla ég að flotta mig á því að fá mér páskaegg á páskadag.

Páskatakmarkið nálgast

2006-03-29T22:10:00.000Z

Síðasta vika gekk hreint ótrúlega vel. Ég léttist um 1,4 kíló og er þá orðinn 105,3. Það þýðir að það vantar bara 300 grömm í páskatakmarkið. Ég ætla samt ekki að slá slöku við í þessari viku. Ef ég næ að komast eitthvað vel niður fyrir 105 kílóin þá ætla ég að verðlauna mig með páskaeggi.

Ömurlega vikan

2006-03-24T21:43:00.000Z

Síðasta vika var ömurleg. Það hlaut líka að koma að því. Ég þyngdist í fyrsta sinn síðan ég byrjaði í DDV. Enda fór ég á ársfund FG í Reykjavík og borðaði bara það sem fyrir mig var lagt þar, datt svo í nammiát um helgina o.s.frv. Í raun bara gott að þyngjast ekki meir. Þess vegna er ég búinn að fylgja DDV út í ystu æsar síðustu þrjá daga og ætla að halda því áfram. Sé svo til hvernig gengur í næstu vigtun. Ef þetta dugar ekki þá veit ég ekki hvað ég geri til að ná markmiðinu mínu um 105 fyrir páska.

Fyllerí og farin kíló

2006-03-14T20:41:00.000Z

Merkilegt að bestu vikurnar mínar virðast vera þegar ég dett rækilega í það. Kannski geri ég það ekki nógu oft. Á freysdaginn var sem sagt teiti með vinnufélögunum. Fyrst var farið í bjórkynningu í Víkingbruggverksmiðjuna þar sem bjórinn flæddi ótæpilega, út að borða á Greifanum og svo partý hjá einum vinnufélaganum. Að því loknu fór ég á Kaffi Akureyri og hélt gleðskapnum áfram. Kom heim um miðja nótt illa farinn en vaknaði samt undarlega hress á laugardagsmorgninum. Eftir þetta átti ég ekki von á miklu í vigtuninni í dag en mér til furðu höfðu farið 2 kíló í vikunni og er það þá líklega næst besta vikan mín frá upphafi. Þar með er ég kominn yfir 20 kílóa þyngdartap og orðin spurning hvort ég geri þetta blogg opinbert?

Hægt og hljótt

2006-03-10T09:48:00.000Z

Þetta gengur svona smám saman. Í síðustu viku fór hálft kíló. Það hefur verið að fara þetta 300, 700 grömm, kíló, hálft kíló o.s.frv. Gengur á meðan það fer niður á við. Á fundinum var talað um að við ættum að setja okkur markmið fyrir páskana. Miða við einhver fimm kíló, tug e.þ.h. Þ.a.l. að ég er að hugsa um að setja mér markmiðið 105 fyrir páska.

Eitt kíló enn

2006-03-01T07:58:00.000Z

Í vigtuninni í gær var eitt kíló farið í viðbót. Það er gott því ég átti ekki von á því. Bæði var að ég drakk þónokkuð rauðvín á laugardaginn og tvo bjóra og eins borðaði ég nokkrum bollum of mikið á bolludaginn. Ekki tók svo betra við eftir vigtun í gær því ég hámaði í mig saltkjöt og baunir eins og ég ætti lífið að leysa. Þrátt fyrir þennan góða árangur finnst mér að ekki hafi gengið of vel eftir áramót og vikurnar sem ég hef ekki náð að missa kíló eða meira full margar. Ég hef samt ekki lent í því að þyngjast eins og sumir. Gengur þó hægt fari.

Torskilið

2006-02-23T18:48:00.000Z

Ég missti 600 grömm í síðustu viku og stend núna í 110 sléttum. Ég hef þá lést um 17 kíló. Það er ekki slæmt. Ég skil reyndar ekki afhverju það fóru 600 grömm núna en 1,8 í síðustu viku. Ég gerði ekkert öðruvísi eða þannig. Ég skipti líka út kílóateljaranum fyrir þennan flotta kílóateljara hjá Jóa mág (hann virkar nú ekki alveg eins og hann á að gera í blogger). Það góða við hann er að maður þarf ekki að búa til nýjan í hverri viku heldur breytir bara tölunum hjá Jóa með tengli sem er þar. Ég hef ákveðið að reyna að halda mig betur við prógrammið í þessari viku en síðustu vikur, þ.e. reyna að borða allan hádegismatinn minn og passa upp á grænmetið og ávextina. Ég hef nefnilega ekki borðað alveg allt sem ég á að borða undanfarið. 600 grömm af grænmeti er bara svo mikið!

Góða vikan

2006-02-15T15:35:00.000Z

Núna kom góða vikan eftir tvær lakari. Kannski er reyndar ekki slæmt að missa 700 grömm en 300 er arfaslakt. Í síðustu viku missti ég sem sagt 1,8 kíló og þarf alltaf að nota innra og innra gat á beltinu. Ég hafði reyndar ekki notað þetta belti lengi þar sem ég tók fram gamlar buxur sem ég var hættur að passa í. Um daginn fór ég hins vegar aftur í buxurnar sem Gulla gaf mér í jólagjöf og smellpössuðu á mig þá og uppgötvaði mér til gleði að ég þurfti að nota belti við þær. Er í 6. gati af 7 á beltinu en þegar ég keypti það fyrir hlutverk Ragga sagga í Freyvangi notaði ég 3. gat. Það eru 4 sentímetrar á milli gata svo mittismálið er orðið 12 sentímetrum minna. Samt var ég í buxnastærð 120 en er núna í 108 og eins og áður sagði þá eru þær frekar víðar. Vonandi heldur þetta áfram að ganga svona vel.

Önnur slæm vika

2006-02-09T11:28:00.000Z

Ekki fóru nú nema 300 grömm í þessari viku enda var ekki við öðru að búast eftir sukkið í Reykjavíkurferðinni. Djúpsteiktar rækjur með súrsætri báða dagana, Lambalæri, kartöflur og sósa hjá Bjössa mág og meira að segja súkkulaðikaka í eftirrétt. Ég má þakka fyrir að hafa ekki þyngst. Ég hef hins vegar á tilfinningunni að þessi vika verði góð.

Hægist á

2006-02-01T08:20:00.000Z

Í vigtuninni í gær hafði ég lést um 700 grömm. Það er mun minna en hingað til. Á móti kemur að ég hafði eiginlega búist við því að það færi að hægja á fyrr. Ég var t.d. pottþéttur á því vikurnar eftir jólin að ég myndi standa í stað eða jafnvel þyngjast eitthvað smávegis. Þess í stað var ein af bestu vikunum mínum á því tímabili. Þar af leiðir að ég er bara ánægður með þessi 700 grömm. Þau eru 700 grömmum meira en ekki neitt og nú verður næsta vika bara frábær. Ég er samt að fara með fjölskylduna til Reykjavíkur um helgina vegna þess að Dagur er að fara á fermingarnámskeið og þá er stundum erfitt að passa sig í mataræðinu. Það ætti samt að vera minna mál núna en oft áður þar sem við fáum íbúðina hjá pabba og mömmu sem verða á Kanarí (hundaeyjum) og getum því séð um alla matreiðslu og innkaup sjálf.

1,6 eða 1,7? Þar er efinn.

2006-01-25T08:25:00.000Z

Í vigtuninni í gær hafði ég lést um 1,6 eða 1,7 kíló. Hún sagði 1,6 og skráði 1,6 í vigtarbókina en þyngdin sýndist mér samt hafa farið úr 115,1 niður í 113,4 semn er að ég held 1,7. Ég er hins vegar ekki að kippa mér mikið upp yfir 100 grömmum og sérstaklega þar sem ég léttist um meira en kíló og fékk því límmiða. Þetta gengur sem sagt eiginlega bara vonum framar og maður hefur alltaf á tilfinningunni að nú hljóti bakslagið að fara að koma. Búinn að léttast um rúm 13 kíló og nálgast 15 kílóa múrinn óðfluga. Kannski verður ekkert verk að komast í gegnum hann. Við sjúm bara til.

Undarlegur árangur

2006-01-17T22:59:00.000Z

Ég léttist ekki mikið yfir hátíðirnar, en því meir í vikunni eftir þær, 2,8 kíló. Það kom mér verulega á óvart því það eina sem ég gerði var að byrja að fylgja DDV mataræðinu aftur eftir að hafa leyft mér ýmislegt. Taldi að með þessu væri líkaminn líklega að losa sig við eitthvað frá hátíðunum og síðan myndi hann stoppa um tíma. Mér fannst líka eins og lítið væri að gerast í síðustu viku. Vigtin hérna heima stóð nokkurn veginn í stað og ég hélt að ég væri að jafna mig eftir þetta mikla þyngdartap í vikunni þar á undan. Í vigtuninni í dag var ég hins vegar 115,1 kíló og er því búinn að léttast um 11,9 kíló frá því ég byrjaði og um 1,2 í síðustu viku sem ég átti alls ekki von á. Þegar það gengur svona vel líka þegar manni finnst ekkert ganga mjög vel þá er þetta ekkert mál. Hins vegar langaði mig gífurlega í súkkulagði um daginn þó ég léti það ekki eftir mér.

Fyrsta áfanga náð

2006-01-10T22:32:00.000Z

Í vigtuninni í dag náði ég að komast undir 117 kíló. Var 116,3 og er þá búinn að tapa 10,7 kílóum. Jibbý. Ég fékk lyklakippu og mikið hrós, kengúrulímiða og fána og er bara rosalega happý. Enda er ég búinn að vera mjög duglegur í DDV síðustu viku og missti 2,8 í vikunni. Sem er líklega full mikið. En kannski er maður bara að taka svona hressilega af stað eftir jólasukkið.

Goal failure

2006-01-03T22:57:00.000Z

Ekki náðist það markmið að léttast um 1,5 kíló yfir jólin. Kannski var það líka fáránlegt en bæði Gullu og Tengdó tókst þó að léttast um meir en það. Sjálfur missti ég slétt kíló og er bara bærilega sáttur við það þar sem ég svindlaði meira en ég ætlaði mér. Gulla sagðist hissa á því að ég skyldi yfirleitt hafa lést nokkuð. Kannski voru það súkkulaðikúlurnar og Hershey's íssósan á gamlárskvöld út á DDV ísinn! Þá er ég búinn að léttast um 7,9 kíló frá því að ég byrjaði.

Nýja árið

2006-01-01T19:09:00.000Z

Gamlársdagur var ekki góður. Of mikið borðað út fytrir DDV og drukkinn bjór, rauðvín, Irish coffee og freyðivín. Nýjársdagur virðist ekki ætla að verða betri. Ég er nú þegar búinn að hesthúsa nokkrar smákökur og þrjá konfektmola. Á morgun verður allt komið í samt lag aftur lofa ég! Lofa, lofa, lofa. Í alvöru!

Jólahátíðin

2005-12-30T15:24:00.000Z

Já, ég missti mig smávegis um jólin. Ekki samt neitt svakalega. Einn daginn fékk ég mér nokkrar smákökur en réttlætti það fyrir mér með því að sleppa ávöxtunum á móti. Ég veit að ávextir eru ólíkt hollari fæða en smákökur en sjálfsblekkjarinn í mér fullyrti að það væri álíka mikið af sykrum í þessu. Ólíkum sykrum að vísu en sykrum samt. Fór líka og spilaði Trivial Pursuit með Jóa mág, Kötu svilkonu og fjölskyldunni hennar, sem var mjög skemmtilegt, en þar borðaði ég nokkuð af konfekti, bæði lakkrís og súkkulaði. Fyrir utan þetta passaði ég mig þó ég sleppti því að vigta hátíðarmatinn vandlega. Frá og með þriðjudeginum tók ég upp hefðbundið DDV mataræði og held að ég hafi náð af mér jólakílóunum aftur. Markmiðið um 1,5 kg yfir jólin stendur því enn. Reyndar hef ég vakað lengi fram eftir á næturnar og vaknað seint svo ég hef aldrei náð fullum grænmetis- eða mjólkurskammti (reyndar held ég að ég hafi aldrei náð fullum mjólkurskammti) nema þegar Gulla bjó til ís í nýju ísvélinni, sem var reyndar tvisvar. Næsta vigtun er 3. jan. eða eftir 4 daga og það verður spennandi að sjá hvort allt hafi gengið vel yfir jólin.

Jólafrí

2005-12-14T08:18:00.000Z

Vigtunin í gær var ekki jafn mikill bömmer og ég hafði búist við. Ég léttist um 900 grömm. Það þýðir að vísu að ég fékk engan límmiða en þar sem ég hafði allt eins búist við því að standa í stað eða þyngjast eftir Reykjavíkurferðina (ég fékk mér líka skyrtertu í afmælisboði á sunnudaginn sem ég minntist ekki á síðast) þá er ég hæstánægður með þetta. Það þýðir líka að ég hef lést um 6,9 kíló frá því ég byrjaði og þar með náð því markmiði mínu að léttast um 5 kíló fyrir jólin og gott betur. Þá er það bara spurning hvort maður þyngist ekki bara aftur um þetta allt saman yfir hátíðirnar. Ég ætla að vísu ekkert að fara að tapa mér í sælgætisáti og smákökuhámi. Hins vegar ætla ég að borða vel af jólamatnum og svoleiðis. Ég held samt að ég geti einsett mér að þyngjast ekki yfir jólin og jafnvel að léttast eitthvað smávegir. Kannski um 1,5 kíló í viðbót. Næsta vigtun er 3. janúar sem er eftir 20 daga eða u.þ.b. 3 vikur svo við erum að tala um 1/2 kíló á viku. Það hlýtur að vera viðráðanlegt.

Ferð, svindl, sukk og vigtun

2005-12-13T12:08:00.000Z

Núna á eftir er vigtun og í framhaldi af þvi jólahlaðborð með réttum sem við DDV-arar megum borða. Ekki verður neitt þó vigtað þar eða borðað eftir fyrirfram ákveðnum skömmtum. Þó geri ég ráð fyrir að allir reyni að halda sig við litla skammta. Gulla bjó til Philadelfia-ostaköku í gær sem er alveg æðislega góð sem ég fer með. Því miður kemst Gulla líklega ekki því það er fundur hjá henni kl. 17.
Annars fór allt úrskeiðis í Reykjavíkurferðinni. Ekki að maður hafi lagst í sælgæti og vitleysu en við ákváðum að það væri of mikið vesen að halda sig við DDV heldur borðuðum bara það sem fyrir okkur var lagt. Pössuðum okkur á að hafa litla sósu, nóg af grænmeti (ef upp á slíkt var boðið) o.s.frv. Ég fékk mér hins vegar smá ís bæði kvöldin og það er ekki nógu gott. Þ.a.l. að ég verð ánægður í vigtuninni á eftir ef ég hef ekki bætt á mig.
Læt þetta nægja í bili.

Hin þriðja vika

2005-12-07T08:10:00.000Z

Í gær var fjórða vigtunin hjá mér og þar með þriðja vikan búin. Það er skemmst frá því að segja að mér hefur gengið mjög vel í síðustu viku og 2,2 kíló í viðbót farin. Það þýðir að ég hef lést um 6 kíló á þessum þremur vikum eða um 2 kíló að meðaltali. Líklega er það heldur mikið og ekki alveg nógu heilsusamlegt að léttast svona hratt. Ég á samt frekar von á því að það hægi á og þyngdartapið sé meira svona í fyrstu. Gulla fór líka yfir tíu kílóin og fékk lyklakippu í verðlaun. Þrátt fyrir þetta hef ég ekki verið mjög passasamur á vigtuninni. Þ.e.a.s. ég hef passað mig á að borða eftir DDV fæðunni en ekki nennt að vigta nákvæmlega brauð, ost, klípu, kjöt o.s.frv. Í flestum þessum fæðuflokkum er líka boðið upp á frávik en grænmetið vigta ég vandlega enda get ég ekki ímyndað mér að borða grammi meira af því en ég þarf.

Léttir

2005-11-30T07:27:00.000Z

Fór í vigtun í gær og var þá búinn að missa 2,1 kíló. Það gera 3,8 samanlagt frá því að ég byrjaði. Ég verð að viðurkenna að ég fékk smá samviskubit yfir þessu þar sem ég datt svona rækilega í það á freysdaginn og áfengi er alger bannvara í DDV. Þar að auki hef ég farið frjálslega með brauðið. Það er vegna þess að Bónusbrauðið er svo stórt að hver sneið er langt umfram 30 grömm, líklega nær því að vera 40 grömm. Þar sem ég nenni ekki alltaf að vera að skera af brauðinu og á að borða 120 grömm af brauði á dag hef ég frekar borðað 3 Bónusbrauðsneiðar en 4 litlar. Mér sýnist það koma í sama stað niður hvað varðar magnið. Þ.a.l. að ég borða morgun og hádegisbrauðið rúmt en sleppi kvöldmatarbrauðinu. Hver fær sér líka brauðsneið með kvöldmatnum?
Annars gengur þetta mjög vel, fyrir utan það hve erfitt mér reynist enn að torga öllu þessu grænmeti.

Svindl

2005-11-27T23:04:00.000Z

Ég svindlaði ærlega á freysdaginn. Þá var rauðvínskvöld og ég drakk talsvert af því. U.þ.b. fimm glös. Þar að auki voru mér gefin þrjú opalskot sem ég þáði. Á móti kemur að ég sleppti ávaxtaskammtinum þann daginn enda er rauðvín unnið úr ávöxtum. Það verður spennandi að sjá hvort þetta kemur niður á mér á þriðjudaginn.

Vigtun

2005-11-24T11:25:00.000Z

Hingað til hef ég ekki vigtað mig heima hjá mér. Ástæðurnar fyrir því eru í raun tvær. Sú fyrri er sú að mín reynsla er sú að fólk sem er í átaki fyllist oft einhverri vigtunarfíkn og vigtar sig jafnvel oft á dag. Því vil ég ekki lenda í. Hin ástæðan er sú að ég tel að vigtartölur sem teknar eru með sólarhrings eða minna millibili gefi ekki rétta mynd af því sem er að eiga sér stað. Þannig er ég hræddur um að ef vigtin mín heima sýndi að ég væri ekki að léttast, jafvel að ég væri að þyngjast, myndu mér falla hendur í skaut og ég jafnvel gefast upp.
Í síðustu viku tapaði ég 1,7 kílóum og það þrátt fyrir að ég væri alltaf pakksaddur og hafði það á tilfinningunni að ég væri frekar að þyngjast en hitt. Kannski hefði vigtun heima við því frekar gefið mér byr í seglin en mótvind. Þ.a.l. að e.t.v. tek ég upp á því að vigta mig 2 - 3 sinnum í viku heima við.

Hin fyrsta vigtun

2005-11-23T08:26:00.000Z

Ég fór í fyrstu vigtunina í gær og þá kom í ljós að ég hafði lést um 1,7 kíló. Ég er mjög ánægður með það. Sérstaklega í ljósi þess að mér finnst ég hafa étið eins og svín og alltaf verið meira og minna pakksaddur.
Mér gengur mjög vel að borða samkvæmt þessu fæði og náði meira að segja að klára fiskskammtana mína í síðustu viku. Mestu vandræðin hef ég átt með vatnið (næ ekki að drekka svona mikið vatn), kjötið (verð að fá meira en þrjár kjötmáltíðir á viku, sérstaklega þar sem skinkan ofan á hádegisbrauðið reiknast með!) og grænmetið (mér finnst mjög erfitt að borða svona mikið grænmeti).
Ég stefni því á það í þessari viku að vera duglegri að drekka vatn, halda mig við minnstu kjötskammtana (þó þeir verði e.t.v. fleiri en þrír) og halda áfram að gúffa í mig 600 gr. af grænmeti á dag.
Markmið mitt er að reyna að vera búinn að ná af mér fimm kílóum fyrir jólin.

DDV sagan mín

2005-11-21T16:41:00.000Z

Síðasta týsdag fór ég í DDV sem er þýtt rangt á íslensku sem íslensku vigtarráðgjafarnir en þýðir náttúrulega dönsku þyngdarráðgjafarnir. Það skiptir samt ekki öllu máli. Gulla var búin að vera í þessu í nokkrar vikur og mér fannst það hafa veruleg áhrif á matseldina hér á heimilinu (Þ.e. Gulla þurfti alltaf að elda sér fyrir sig eftir að ég var búinn að elda fyrir mig og strákana). Þar að auki fannst mér að Gulla þyrfti meiri stuðning við sinn breytta lífsstíl en gat veitt henni án þess að breyta um mataræði sjálfur.
Þetta var helsta ástæðan en þó skipti ekki minna máli að sjálfur er ég talsvert yfir kjörþyngd. Ég hef reynt hitt og þetta til að léttast en ekkert virkað almennilega fyrir utan Atkins mataræðið sem ég var á um tíma. Hins vegar hef ég verið svipaður allt frá því að ég var 18 ára og hvorki fitnað mikið né grennst með árunum. Ég á því ekki við Jó-jó vandamál að stríða.
Ég var búinn að velta því lengi fyrir mér að ganga í DDV með Gullu en helsta ástæðan fyrir því að ég dró það á langinn var sú að mér skildist að maður þyrfti að borða 1.000 grömm af grænmeti á dag. Fyrir mann eins og mig sem finnst flest grænmeti vont og sumt grænmeti allt í lagi og ekkert grænmeti gott er það talsvert erfið tilhugsun. Síðan tók ég eftir því að magnið var ekki 1.000 heldur 600 grömm og það finnst mér mun viðráðanlegra. Þegar ég var því búinn að safna í mig kjarki fór ég á nýliðafund, skráði mig í DDV og komst að því að maður þarf að borða 3 - 5 fiskmáltíðir á viku!
Ef það er eitthvað sem mér finnst verra en grænmeti þá er það fiskur.
Þessi fullyrðing er oft misskilin. Í raun er það bara hvítur fiskur sem mér finnst vondur og þá einna helst ef hann er soðinn (hann er ögn skárri steiktur). Hins vegar finnast mér rækjur góðar, skelfiskur, túnfiskur, lax og silungur (þá helst reyktur eða grafinn), sardínur, síld er þolanleg, sérstaklega kryddsíld. Ég get því vel borðað allar þessar fiskmáltíðir. Í gær fékk ég mér rækjur og á morgun ætla ég að fá mér reyktan silung. Svo á ég helling af túnfiski uppi í skáp.
Það getur sem sagt verið erfitt fyrir rótgróna kjötætu að fara í DDV. Á móti kemur að ég er ekkert sérstaklega háður sælgæti og í raun finnst mér fullmikið af brauði í þessu mataræði. Ég þarf að borða 4 brauðsneiðar á dag!
600 grömm af grænmeti er líka frekar mikið en með því að sjóða það, steikja eða baka verður það allt í lagi. Í dag keypti ég Bambussprota og ég hef helst viljað nota grænmeti eins og lauk, Zucchini, eggaldin, sveppi, ætiþistla, brokkolí, blómkál, rófur og gulrætur (þetta er það grænmeti sem mér finnst skást á bragðið). Það góða við þetta grænmeti er það að blómkál, rófur og gulrætur er bæði þungt og fínt hrátt og allt þetta er ljómandi gott að steikja, sérstaklega með smá sojasósu og kryddi eftir smekk.
Ég held að mér hafi gengið vel hingað til en ég er ekki viss þar sem ég hef ekki viljað vigta mig hérna heima. Ég sé bara til næsta týsdag.

Í upphafi

2005-11-20T17:18:00.000Z

Það gengur eitthvað erfiðlega að setja eitthvað hingað inn, en ég hætti ekki að reyna.